सैनामैना–७ देउवापार स्थित बुद्ध इङलिस स्कुलले विद्यार्थीहरूलाई सुरक्षित भविष्य दिने उद्देश्यका साथ लागू गरेको बीमा योजना कार्यक्रमको प्रभावकारिता देखिएको छ ।
विद्यालयले शैक्षिक सत्रको सुरुमै घोषणा गरेअनुसार सिद्धार्थ प्रिमियम इन्स्योरेन्ससँगको सहकार्यमा लागू गरिएको बीमा कार्यक्रम शिक्षासँगै विद्यार्थी र कर्मचारीको स्वास्थ्य सुरक्षा सुनिश्चित गर्ने महत्वपूर्ण प्रयास बनेको छ ।
विद्यालयले लागू गरेको बिमा योजनाअन्तर्गत चोटपटक र बिरामी भएर उपचाररत दुई विद्यार्थीलाई मङ्गलबार बीमा बापतको रकम हस्तान्त्रण गरिएको छ ।
विद्यालयमा कक्षा २ मा अध्ययनरत अभिषेक गौतमलाई १० हजार १ सय, युकेजीका शोमिक बि.क.लाई ९ हजार ३ सय रुपैयाँ प्रदान गरिएको विद्यालयका प्राचार्य लेखनाथ गैरेले जानकारी गराउनुभयो ।
बीमा योजना विद्यालय वा विद्यालयबाहिर जहाँसुकै चोटपटक वा बिरामी भएपनि उपचार खर्च बेहोर्ने गरी योजना लागु गरिएको जानकारी गराउँदै उहाँले विद्यार्थीको शिक्षा मात्र नभई स्वास्थ्य र जीवन सुरक्षामा पनि विद्यालयले विशेष ध्यान दिएको बताउनुभयो । अभिभावकले आफ्ना बालबालिकालाई विद्यालय पठाउँदा ढुक्क महसुस गर्न सकून् भन्नेले उद्देश्यले बिमा कार्यक्रम लागु गरिएको उल्लेख गर्नुभयो ।
विद्यालय व्यवस्थापन समितिका अध्यक्ष खिमराज पोख्रेले रकम हस्तान्त्रण गर्दै विद्याथीहरुलाई आकस्मिक स्वास्थ्य जोखिममा पर्दा अभिभावकलाई आर्थिक भार कम गर्न बिमा कार्यक्रम प्रभावकारी बनेको बताउनुभयो । बुद्ध स्कुलले शिक्षा र सुरक्षालाई एकैसाथ प्राथमिकता दिएर अगाडी बढेको उल्लेख गर्नुभयो ।
