रुपन्देहीको गैडहवा गाउँपालिकामा सञ्चालित चौथो गाउँपालिका अध्यक्ष कप खुल्ला पुरुष भलिबल प्रतियोगिताको उपाधि बुटवलस्थित न्यू होराइजन स्पोर्टस क्लवले हात पारेको छ ।
श्री शान्ति युवा क्लव, गैडहवा–४ गैडाताल रुपन्देहीको आयोजनामा सम्पन्न भएको प्रतियोगितामा उत्कृष्ट प्रदर्शन गर्दै न्यू होराइजनले उपाधि जितेको हो ।
उपाधि जितेसँगै न्यू होराइजनले नगद १ लाख ११ हजार १ सय ११ रुपैयाँ सहित आकर्षक कप, मेडल र प्रमाणपत्र प्राप्त गरेको छ । फाइनलमा उपविजेता बनेको मणिमुकुन्द भलिबल क्लव (निलो) ले नगद ७१ हजार १ सय ११ रुपैयाँमा चित्त बुझायो ।
प्रतियोगितामा स्याङ्गजा भलिवल क्लव तेश्रो हुँदै नगद ३१ हजार १ सय ११ रुपैयाँ र मणिमुकुण्ड भलिवल क्लव रातो सान्त्वना हुँदै नगद २१ हजार १११ रुपैयाँ प्राप्त गर्न सफल भए ।
प्रतियोगिता अवधिभर विभिन्न ६ विधाहरूमा उत्कृष्ट खेल प्रदर्शन गर्ने खेलाडीहरूलाई पनि नगद पुरस्कारसहित सम्मान गरिएको थियो । प्रतियोगिता अवधिभर उत्कृष्ट खेल प्रदर्शन गर्दै न्यू होराइजनका प्रदीप कुमार चौधरी उत्कृष्ट खेलाडी घोषित हुदै नगद २ हजार ५ सय, ट्रफी मेडल र प्रमाण पत्र प्राप्त गरेका छन् ।
मणिमुकुण्ड भलिवल क्लवका सुरज मुसहर उत्कृष्ट सर्भर न्यू होराइजन स्पोर्टस क्लवका दिप सुनार उत्कृष्ट ब्लकर, न्यू होराइजनका आयूष थापा उत्कृष्ट डिफेण्डर, जगदीस वझा उत्कृष्ट सेटर र सागर रसौली उत्कृष्ट स्पाइकरबाट पुरस्कृत भएका छन् । उनिहरु जनही नगद १ हजार ५ सय, ट्रफी मेडल र प्रमाण पत्र प्राप्त गरेको खेल संयोजक शेर बहादुर कामु मगरले जानकारी गराए ।
प्रतियोगितामा पाल्पा, कपिलबस्तु, नवपरासी, रुपन्देही, स्याङ्गजाका गरी जम्मा ११ भलिवल टिमहरूले सहभागिता जनाएका थिए ।
प्रतियोगिताको समापन गर्दै गैडहवा गाउँपालिकाका अध्यक्ष सुरेन्द्र पौडेलले भलिवल प्रतियोगिताले रुपन्देहीको सबैभन्दा ठूलो ताल गैडहवातालको पर्यटन प्रवद्र्धनमा महत्वपूर्ण भूमिका खेल्ने विश्वास व्यक्त गरे ।
उनले पालिकाले खेलकुदलाई केवल मनोरञ्जनको साधनका रूपमा मात्र नभई पर्यटन प्रबद्र्धन र पहिचानको मुख्य सूचकका रूपमा लिएको स्पष्ट पारे । सोही उद्देश्य प्राप्तिका लागि पालिकाको योजना पुस्तिकामै हरेक वर्ष भलिबल प्रतियोगिता सञ्चालन गर्न बजेटको व्यवस्था गर्दै आएको जानकारी दिए ।
“हामीले यो प्रतियोगिता गैडहातालको पर्यटकीय महत्वलाई राष्ट्रिय तथा अन्तर्राष्ट्रिय स्तरमा पु¥याउने उद्देश्यका साथ आयोजना गरेका हौँ,“ अध्यक्ष पौडेलले भने ।
गैडहवा गाउँपालिका–४ का वडा अध्यक्ष सुरेन्द्र कुर्मी र वडा सदस्य तुल बहादुर बि.क.ले लुम्बिनी भ्रमणमा आउने हरेक पर्यटकलाई गैडहवा तालको अवलोकनमा ल्याउने वातावरण बनाउन सकेमा सामुदायिक होम स्टे र स्थानीयको रोजगारीमा समेत अवसर खुल्ने धारणा राखे ।
