नेपाली काँग्रेस वडा कार्यसमिति सैनामैना–२ को वडा भेला शनिबार सम्पन्न भएको छ । वडा सभापति विमल ज्ञवालीको सभापतित्वमा सम्पन्न भेलामा क्षेत्रीय प्रतिनिधि, वडा कार्यसमिति सदस्य, भातृसंस्थाका पदाधिकारी र क्रियाशील सदस्यहरूको उपस्थिति रहेको थियो । भेलामा पार्टीको आगामी रणनीति र स्थानीय तहका गतिविधिको समीक्षा गरिएको थियो ।
भेलालाई सम्बोधन गर्दै नेपाली काँग्रेस महाधिवेशन प्रतिनिधि एवं सैनामैना नगरपालिकाका प्रमुख फणेन्द्र प्रसाद शर्माले लोकतन्त्रलाई बलियो बनाउन र जनताका समस्या समाधान गर्न काँग्रेसका हरेक कार्यकर्ता जिम्मेवार बन्नुपर्नेमा जोड दिए । उनले कार्यकर्ताहरूलाई जनताको आवश्यकता र बदलिँदो राजनीतिक चेतनाप्रति संवेदनशील बन्न आग्रह गरे ।
नेपाली काँग्रेस लुम्बिनी प्रदेश सदस्य गोविन्द लम्सालले पार्टी संगठनलाई मजबुत बनाउनका लागि स्पष्ट कार्ययोजना बनाएर अगाडि बढ्नुपर्ने बताए । उनले नियमित टोल तथा वडा बैठक बस्ने, कांग्रेस जनताको घरघरमा पुगेर जनताको भावना अनुसार काम गर्नेगरी संगठन निर्माणमा लाग्नुपर्ने जोड दिए ।
नेपाली काँग्रेस क्षेत्र नं.–२ का सभापति प्रजापाल गिरीले काँग्रेस लोकतन्त्रको रक्षाका लागि प्रतिबद्ध रहेको भन्दै कार्यकर्ताहरूलाई एकजुट भएर अगाडि बढ्न आह्वान गरे । हालै देशमा देखिएको ’जेनजी’ आन्दोलनले ठूला दलहरूमाथि प्रश्न उठाएको सन्दर्भलाई जोड्दै नेताहरूले अब पार्टीले आफ्नो कार्यशैलीमा सुधार ल्याउनुपर्नेमा जोड दिएका छन् । ’जेनजी’ पुस्ताको निराशालाई सम्बोधन गर्न र गलत हल्लाको पछि नलागी कांग्रेसजन एकजुट भएर अगाडि बढ्नुपर्ने उनको भनाइ थियो ।
कार्यक्रममा कञ्चन गाउँपालिकाका अध्यक्ष नवराज ढकाल, सैनामैना नगरसभापति रणबहादुर खनाल, नेपाली काँग्रेस क्षेत्र नं.–२ ख का सचिव कमला न्यौपाने लगायतले बोल्दै पार्टीलाई सुदृढ र सबल बनाउन सबै लाग्नुपर्ने बताएका थिए ।
वडा सभापति विमल ज्ञवालीले सैनामैनामै वडा–२ पहिलो भेला गर्ने वडा बनेको बताए । वडामा काँग्रेसका प्रतिनिधि हरेक तहतप्कामा नेतृत्वदायी भूमिकामा रहेकाले उपलब्धिमूलक परिणाम प्राप्त भएको उनले बताए ।
पार्टीको केन्द्रीय निर्देशन अनुसार आगामी अधिवेशन र संगठन सुदृढीकरणका लागि तयारी थालेको जानकारी दिए ।
नेपाली काँग्रेस वडा कार्यसमिति सैनामैना–२ का उपसभापति निर्माला बेल्बासेको स्वागत तथा सचिव विष्णु गौतमको सञ्चालनमा भेला सम्पन्न भएको थियो ।
