सप्तऋषि बचत तथा ऋण सहकारी संस्था लिमिटेडको १७ औँ साधारण सभा तथा छैठौँ अधिवेशन शुक्रबार सम्पन्न भएको छ । अधिवेशनले मित्र बहादुर ए.सीको अध्यक्षतामा नयाँ कार्यसमिति सर्वसम्मत चयन गरेको छ ।
निर्वाचन समितिका संयोजक चित्र बहादुर के.सी.का अनुसार समितिको उपाध्यक्षमा जमुना पोख्रेल, सचिवमा होमनाथ अर्याल र कोषाध्यक्षमा कृष्णकला काफ्ले चयन भएका छन् । कार्यसमिति सदस्यहरूमा डिल कुमारी पोख्रेल, हरिप्रसाद पन्थी, माया ढकाल, कृष्ण प्रसाद चौधरी र यज्ञ कुमारी गौतम सर्वसम्मत चयन भएका छन् ।
यसैगरी अशोक खड्काको संयोजकत्वमा तीन सदस्यीय लेखा समिति गठन भएको छ, जसको सदस्यमा सावित्रा पोख्रेल र चेत नारायण पाण्डे रहेका छन् ।
नवनिर्वाचित कार्यसमितिले शुक्रबार नै पद तथा गोपनियताको शपथ खाएका छन् । सो अवसरमा नवनिर्वाचित अध्यक्ष मित्र बहादुर एसीले संस्थाले अगाडि सारेका योजनाहरूलाई पूरा गर्दै उच्च र रचनात्मक कार्यहरू मार्फत अगाडि बढ्ने प्रतिबद्धता व्यक्त गरे ।
साधारण सभा संस्थाका अध्यक्ष प्रेम बहादुर बाँनियाले समाजमा छरिएर रहेको पूँजीलाई एकीकृत गर्दै स्थापना गरिएको सहकारी संस्था अब फल दिन सक्ने ’कल्पवृक्ष’को रूपमा खडा भएको बताएका छन् । उनले हाल २ हजार ६ सय ४० शेयर सदस्य पुगेर ठूलो संस्था बनेकोमा खुसी व्यक्त गरे ।
२०६३ सालमा २५ जना युवाहरूको सक्रियतामा स्थापना भएको सहकारीले सदस्यहरूको सीप र कलाको विकास गर्दै स्वरोजगारमूलक व्यवसाय स्थापना गर्न र गरिबी न्यूनीकरणमा महत्वपूर्ण योगदान गर्दै आएको उल्लेख गरे । “सहकारी एउटा कल्पवृक्ष हो,“ उनले भने– “सप्तऋषि सहकारीको रुपमा एउटा विरुवा रोपेर मलजल, संरक्षण गरेर हुर्काउन सफल भएका छौँ । त्यसकारण विरुवा अब फल दिन सक्ने वृक्षको रुपमा खडा भएको छ ।“
उनले सहकारी नीति नियमले चल्ने संस्था भएकाले सोहीअनुरूप सदस्य वृद्धि गर्दै आर्थिक र सामाजिक उन्नतिमा अगाडि बढ्दै विगतका जस्तै अबका दिनमा पनि सफलतालाई निरन्तरता दिन सुझाव दिदैँ नयाँ कार्यसमितिलाई शुभकामना दिए ।
कार्यक्रमका प्रमुख अतिथि तथा सहकारीका जेष्ठ सेयरसदस्य हरि प्रसाद भट्टराईले संस्थाले शेयर सदस्यहरुलाई विश्वसिलो वित्तीय कारोबार प्रदान गरी उनीहरूको आर्थिक सबलतामा महत्वपूर्ण भूमिका खेलेको उल्लेख गरे । सहकारीले बचत संकलन, उद्यम, व्यवसाय र रोजगारीका अवसर सिर्जना गरि सदस्यहरुलाई आर्थिक, सामाजिक र नेतृत्वदायी तहमा पुर्याउन संस्थाले गरेको प्रगतिको प्रशंसा गरे । भट्टराईले सहकारीलाई अझ सशक्त बनाउन सुझाव दिँदै “संस्थाले गरेको यस योगदानलाई कायम राख्दै समितिले अगाडि बढेर सैनामैनामै अग्रणी वित्तीय संस्था बनाउन लाग्नुपर्छ ।“
सहकारीका शैक्षिक सल्लाहकार चुन्नु प्रसाद पाण्डेले सहकारीले सहकारी सिद्धान्त, मूल्य, मान्यता र ऐन निर्देशनहरूलाई आत्मसात गर्दै सदस्यहरूलाई सेवा प्रवाह गर्न आग्रह गरे ।
उत्कृष्ट बचतकर्ता सम्मान
साधारण सभाको अवसरमा विभिन्न विधामा उत्कृष्टहरूलाई सम्मान गरिएको थियो । उत्कृष्ट बचतकर्ता सम्मानतर्फ बाल बचतबाट सम्राट बस्नेत, खुत्रुके बचत दिप्सन आचार्य, ऐच्छिक बचत नवराज बन्जाडे, आवधिक बचत टिका बहादुर थापा क्षेत्री, असल मालिक बचत निलम कुमारी क्षेत्रीलाई सम्मान–पत्रले सम्मान गरिएको हो ।
शैक्षिक सम्मानतर्फ
शैक्षिक सम्मानतर्फ कक्षा १२ मा उत्कृष्ट अंक ल्याउने अनिश आचार्य (३.७० जिपिए) र झरना अर्याल (३.५८ जिपिए) लाई प्रशंसा–पत्र, एमबीबीएस पूर्ण छात्रवृत्तिमा नाम निकाल्न सफल संजय खराललाई विशिष्ट शैक्षिक सम्मानले सम्मान–पत्र प्रदान गरिएको थियो ।
योगदान सम्मान
संस्थागत विकासमा योगदानतर्फ पिताम्बर शर्मा, योगदानमा आधारित योजनामा सहभागिता चेतनारायण पाण्डे, उर्मिला पाण्डे, मोतिलाल पाण्डलाई प्रमाण–पत्र प्रदान गरिएको हो ।
उत्कृष्ट कर्मचारी, सदस्य वृद्धि अभियान
शेयर सदस्य वृद्धि अभियानमा सरस्वती भ¤राई र उत्कृष्ट कर्मचारी कल्पना दर्लामीलाई सम्मान–पत्रले सम्मान गरिएको थियो ।
संस्थाका प्रबन्धक प्रमुख कोषराज बस्नेतका अनुसार सहकारीले महिला सदस्यहरूका लागि सुत्केरी कोसेली उपहार, प्रकृति विपत्ति राहत सुविधा, सदस्यहरूलाई स्वास्थ्य समस्या पर्दा एक महिनाका लागि निब्र्याजी ऋण, गरीब तथा जेहेनदार विद्यार्थीलाई शैक्षिक सामग्री वितरण लगायतका सामाजिक कार्यक्रमहरू सञ्चालन गर्दै आएको छ ।
साधारण सभामा प्रस्तुत वार्षिक प्रतिवेदनमा सहकारीले आर्थिक वर्ष २०८१÷८२ मा कुल आम्दानी २ करोड ७६ लाख ४४ हजार ९ सय २१ रुपैयाँ र खर्च २ करोड ३३ लाख १२ हजार ९ सय ८५ रुपैयाँ गरेको छ ।
साधारण सभा संस्थाका निवर्तमान अध्यक्ष प्रेम बहादुर बाँनियाको अध्यक्षता, जेष्ठ सेयरसदस्य हरि प्रसाद भट्टराईको प्रमुख आतिथ्यता रहेको कार्यक्रमको स्वागत उपाध्यक्ष जमुना पोख्रेल र सञ्चालन सचिव मित्र बहादुर एसीले गरेका थिए ।
