राष्ट्रको सेवा र नेतृत्व विकासको जग बसाल्ने उद्देश्यका साथ पर्रोहा माध्यमिक विद्यालय सैनामैना–४ मा नेपाली सेनाद्वारा सञ्चालित जुनियर राष्ट्रिय सेवा दल (एनसीसी ) तालिमको पहिलो चरण सम्पन्न भएको छ ।
शुक्रबार विद्यालयमा आयोजित कार्यक्रममा विद्यार्थी क्याडेटहरूले उच्च अनुशासन, सैनिक कला र नेतृत्व क्षमताको उत्कृष्ट प्रदर्शन गरे । उनीहरूले सैनामैना नगरपालिकाका प्रमुख फणेन्द्र प्रसाद शर्मालाई सलामी अर्पण गर्नुका साथै मार्चपास, खुकुरी ड्रिल, तेक्वान्दो, र एरोबिक्स जस्ता सीपहरू प्रस्तुत गरेका थिए ।
विद्यालयस्तरमा विद्यार्थी क्याडेटहरूले तालिमपश्चात् सिकेका सीपहरूमा सैनिक शैलीको अनुशासन र सम्मान प्रदर्शन गर्दै मार्चपास र सलामी अर्पण, नेपाली वीरता र आत्मरक्षाको कला देखाउँदै खुकुरी ड्रिल, शारीरिक तन्दुरुस्ती र आत्मसुरक्षा सिपमा एरोबिक्स र तेक्वान्दो र मिलिट्री सिपको आधारभूत ज्ञानमा सैनिक कला प्रर्दशन गरेका थिए ।
श्री तारादलका गणपति प्रमुख सेनानी कल्याण पाण्डेका अनुसार श्री राष्ट्रिय सेवा दल मध्य तालिम शिक्षालय हात्तिखोर सि.स. ५१ औं जुनियर डिभिजन अन्तर्गत पर्रोहा माध्यमिक विद्यालयका ३० जना (१५ छात्र र १५ छात्रा) विद्यार्थीहरूले तालिममा सहभागिता जनाएका थिए । विद्यालयमा नियमित ७९ दिनसम्म चलेको प्रशिक्षणले विद्यार्थीहरूमा नेतृत्व विकास, अनुसाशन, निःस्वार्थ सेवाको भावना, र राष्ट्रप्रेम जस्ता गुणहरूको विकास गरेको छ ।
प्रमुख सेनानी पाण्डेले भने– ’अनुशासन नै राष्ट्रको सेवाको मूल जग हो’ भन्ने आदर्श बोकेको एनसीसीले युवा विद्यार्थीहरूमा चरित्र, नेतृत्व विकास, खेलकुद भावना, र निःस्वार्थ सेवाको आदर्श भावनाको विकास गरी जीवनका सबै क्षेत्रमा समर्पित नेतृत्व क्षमता अभिवृद्धि गर्न सहयोग पु¥याउनु हो । तालिम सैद्धान्तिक र व्यावहारिक ज्ञान दिन पाठ्यक्रमद्वारा निर्देशित गरिएको बताए ।
विद्यालयस्तरमा सिकाई सिप समापन गरिए पनि तालिमको अन्तिम चरण बाँकी छ । अब बाँकी २१ दिन क्याडेटहरूका लागि श्री राष्ट्रिय सेवा दल मध्य तालिम शिक्षालय हात्तिखोरमा विशेष आवासीय क्याम्पसहित प्रशिक्षण आयोजना गरिनेछ । एक सय दिनको प्रशिक्षणपश्चात सम्पूर्ण चरण पार गरेपछि उनीहरूलाई योग्यता अनुसारको दज्र्यानी चिह्न प्रदान गरिने छ ।
कार्यक्रमका प्रमुख अतिथि सैनामैना नगरपालिका प्रमुख फणेन्द्र प्रसाद शर्माले विद्यार्थीहरूको प्रदर्शनको उच्च प्रशंसा गर्दै एनसीसी कार्यक्रमले देश नवनिर्माणमा महत्वपूर्ण इँटा थप्ने विश्वास व्यक्त गरे । “हामीले अहिले राष्ट्रप्रति घृणा उत्पन्न गर्ने गतिविधिहरू देख्छौँ, तर यस्ता राष्ट्रिय सेवक कर्णधारहरूले राष्ट्रलाई मलजल गरेर सुन्दर नेपाल निर्माण गर्ने अभियानमा लाग्नुभएको छ,“ नगर प्रमुख शर्माले भने । उनले विद्यार्थीहरूले ’हिमाल, पहाड, तराई सबै जातजाति धर्म एउटै हो’ भन्ने सन्देश दिएकोमा कृतज्ञता व्यक्त गर्दै देशलाई स्वर्ग बनाउन दृढ संकल्पका साथ अगाडि बढ्न आग्रह गरे ।
विद्यालयका प्रधानाध्यापक बल बहादुर के.सी.ले कक्षा ८, ९, र १० मा अध्ययनर ३० जना विद्यार्थी शारीरिक तन्दुरुस्ती र स्वास्थ्य परीक्षणपछि जुनियर एमसीसी तालिमका लागि छनोट भएको जानकारी दिए । उनले प्रथम प्रवचनको सिकाईपश्चात २१ दिनसम्म क्याम्पमा आवासीयसहित प्रशिक्षितका लागि जाने विद्यार्थीहरूलाई सक्रिय भएर सिकाई सिक्न सुझाव दिए । सेनाको ब्यारेकको यो अनुभवले उनीहरूको सीप र ज्ञानलाई अझ परिष्कृत गर्ने विश्वास व्यक्त गरे ।
कार्यक्रममा सैनामैना–४ का कार्यबाहक वडा अध्यक्ष निशा परियार, इलाका प्रहरी कार्यालय रन्यौर प्रमुख प्रहलाद के.सी., विद्यालय व्यवस्थापन समिति र अभिभावक समितिका पदाधिकारी तथा शिक्षक विद्यार्थीहरूको सहभागिता रहेको थियो ।
सैनामैना फुटबल रंगशालामा आयोजना गरिएको कार्यक्रमको संचालन शिक्षक धन बहादुर रानाले गरेका थिए ।
