सैनामैना जेसीज वर्ष २०२५ को आयोजनामा शुक्रबारदेखि जेसीज सप्ताह कार्यक्रम सुरु भएको छ । ‘It’s Our Time to Lead’ (इटस आवर टाइम टु लिड) भन्ने मूल नारासहित युवाहरूलाई नेतृत्व र व्यक्तित्व विकासका कार्यक्रम सञ्चालन गरिरहेको सैनामैना जेसीजले साताव्यापी कार्यक्रम गरी सप्ताह मनाउँदै छ ।
सप्ताह कार्यक्रमको पहिलो दिन सुनगाभा पब्लिक स्कूलमा कक्षा १२ का विद्यार्थीहरूलाई लक्षित गरी अवचेतन मन सम्बन्धि एक दिने अभिमुखीकरण कार्यक्रम सम्पन्न भएको छ ।
सुनगाभा पब्लिक स्कूल प्राचार्य तिलब के.सीले अन्तर्राष्ट्रिय क्लबहरूमा आबद्धताले विद्यार्थीहरूलाई सैद्धान्तिक ज्ञानभन्दा माथि उठेर नेतृत्व क्षमता, प्रणालीगत ज्ञान (क्थकतझ कभलकभ) र सामाजिक दायित्वको बोध गराउँछ महत्वपूर्ण भूमिका खेल्ने बताए । उनले व्यवहारिक शिक्षा नै उज्वल भविष्य निर्माणको निर्णायक कडी रहेकाले विद्यार्थीहरूलाई केवल जागिर खाने मात्र नभएर संसार बदल्ने नागरिक बनाउन सहयोग गर्ने बताए ।
नेपाल जेसीजका पूर्वउपाध्यक्ष विमल ज्ञवाली भन्छन्– जेसीज भनेको युवाहरूको ऊर्जालाई सही दिशा दिने एउटा मञ्च हो । जेसीजले केवल नेतृत्व क्षमता मात्र बढाउँदैन, व्यावसायिक र सामाजिक क्षेत्रमा जनसम्पर्क (पिआर) सञ्जाललाई मजबुत बनाउँछ ।
जेसीजको प्रशिक्षणले हरेक युवालाई व्यक्तित्व निमार्ण, सफल उद्यमी एंव व्यवसायी र कुशल नेतृत्वकर्ताको रूपमा स्थापित गर्नका जग बसाल्ने भुमिका खेल्ने उल्लेख गर्दै उनले युवाहरुलाई जेसीजमा जोडिन आग्रह गरे ।
इलाका प्रहरी कार्यालय रन्यौराका प्रमुख प्रहलाद के.सी. ले वर्तमान जेनजी युवाहरूलाई लक्षित गर्दै शासन व्यक्ति होइन, विधि हुनुपर्छ भन्ने मन्त्रलाई गहिरोसँग आत्मासात गर्नुपर्नेमा जोड दिए । उनले भने– “समाजलाई सही दिशा दिनका लागि हामीले भावनात्मक निर्णयभन्दा माथि उठेर कानूनको सम्मान र विधि–विधानको पालना गर्ने संस्कार बसाल्नुपर्छ । युवाहरूले विधिको पालना गर्दै भ्रष्टाचारमुक्त र पारदर्शी समाज निर्माण बनाउनुपर्छ ।“
सैनामैना जेसीज जेसीज वर्ष २०२५ का अध्यक्ष गोविन्द खरेलले युवाहरूको व्यक्तित्व तथा नेतृत्व विकासमा जेसीजले निरन्तर काम गर्दै आएको बताए । उनले पछिल्लो समय अवचेतन मन (Subconscious Mind)सम्बन्धी समस्या बढी देखिएको सन्दर्भमा भविष्यको सिँढी चढ्दै गरेका विद्यार्थीहरूलाई सही मार्गदर्शन दिन कार्यक्रमले महत्वपूर्ण भूमिका खेल्ने विश्वास व्यक्त गरे ।
कार्यक्रममा जेसीआई प्रशिक्षक तथा देवदह जेसीजका अध्यक्ष दिपक अधिकारीले प्रशिक्षण दिएका थिए । उनले विशेष गरी मानसिक स्वास्थ्य, तनाव व्यवस्थापन, आत्मविश्वास निर्माण र सकारात्मक सोच विकास सम्बन्धी व्यावहारिक कार्यशालाहरू सञ्चालन गरेका थिए, जसले विद्यार्थीहरूलाई भावी जीवनका लागि तयार हुन मद्दत गर्ने अपेक्षा गरिएको छ ।
कार्यक्रममा जेसीज वर्ष २०२५ का सल्लाहकार कृष्ण भण्डारी, विद्यालयका सह–प्राचार्य कमल पौडेल, कोषाध्यक्ष सन्दिप सेन्चुरी, जेसी विष्णु सापकोटा, हर्षित गौतम लगायतका पदाधिकारीहरूको उपस्थिति रहेको थियो ।
कार्यक्रम संयोजक प्रेम न्यौपानेको स्वागत, जेसीज वर्ष २०२५ का कार्यकारिणी उपाध्यक्ष कमल ढकालको धन्यवाद ज्ञापन तथा जेसीज वर्ष २०२५ का महासचिव गोपाल भण्डारीको संचालनमा कार्यक्रम सम्पन्न भएको थियो ।
सप्ताहका आगामी कार्यक्रमहरू
सप्ताहका अन्र्तगत शनिबार सैनामैना–४ मा अवस्थित सैनामैना फुटबल रङ्गशाला परिसरमा वृक्षरोपण एवं बोट बिरुवा संरक्षण कार्यक्रम आयोजना गरिएको सप्ताह कार्यक्रमका संयोजक कमल ढकालले जानकारी गराए । यस्तै आइतबार सैनामैना वडा–१ देखि ४ का विद्यालयहरूका चालक र सहचालकलाई लक्षित गरी ट्राफिक सचेतना कार्यक्रम सञ्चालन गरिनेछ भने खाद्यान्न र शैक्षिक सामग्री वितरण कार्यक्रम गरेर जेसीज सप्ताहको समापन गरिने छ ।
