सैनामैना जेसीजले आफ्नो सप्ताहव्यापी कार्यक्रम अन्तर्गत दोस्रो दिन शनिबार मुर्गिया फुटबल रंगशाला परिसरमा वृक्षारोपण एंव विरुवा संरक्षण कार्यक्रम सम्पन्न गरेको छ । वातावरण संरक्षणमा युवाको सक्रियतालाई आत्मसात गर्दै रंगशाला परिसरमा रोपिएका विरुवाहरूको गोडमेल गर्नुका साथै थप विरुवाहरू रोपेर वातावरण जोगाउने सन्देश दिएको छ ।
कार्यक्रम सैनामैना जेसीज वर्ष २०२५ का अध्यक्ष गोविन्द खरेलको अध्यक्षता र सैनामैना नगरपालिकाका प्रमुख फणेन्द्र प्रसाद शर्माको प्रमुख आतिथ्यतामा सम्पन्न भएको थियो ।
वृक्षारोपणमा बोल्दै प्रमुख अतिथि शर्माले वातावरण संरक्षणका लागि वृक्षारोपण एक महत्वपूर्ण र अत्यावश्यक अभियान भएकोमा जोड दिए । उनले भने–“वातावरण सन्तुलनका लागि वृक्षारोपण अनिवार्य छ । सैनामैना जेसीजले जसरी समुदायस्तरमा यस्ता रचनात्मक कार्यक्रम गरेको छ, यसलाई निरन्तरता दिनु अपरिहार्य छ । नगरपालिकाको तर्फबाट यस्ता युवा केन्द्रित कार्यक्रममा पूर्ण साथ रहनेछ ।“
यसैगरी, सैनामैना–४ का वडा अध्यक्ष एंव सैनामैना जेसीजका संस्थापक अध्यक्ष रामप्रसाद अधिकारीले जेसीजलाई युवाहरूको नेतृत्व विकास गर्ने महत्वपूर्ण थालोको रूपमा व्याख्या गरे । उनले जेसीजले समाज परिवर्तन र युवा नेतृत्व निर्माणमा खेलेको भूमिकाको उच्च प्रशंसा गरे ।
कार्यक्रमका अध्यक्ष गोविन्द खरेलले सैनामैना जेसीजले सामाजिक उत्तरदायित्व बहन गर्दै सप्ताहव्यापी कार्यक्रम अगाडि बढाएको जानकारी दिए । उनले स्वस्थ वातावरण बिना स्वस्थ जीवन सम्भव नभएकाले रोपिएका विरुवाको संरक्षण र थप वृक्षारोपण अभियानलाई महत्व दिएको बताए ।
वृक्षारोपण तथा विरुवा संरक्षण कार्यक्रममा जनप्रतिनिधिहरू, मुर्गिया खानेपानी संस्थाका पदाधिकारीहरू, मुर्गिया फुटबल क्लबका प्रतिनिधिहरू, टोल विकास संस्थाका प्रतिनिधिहरूका साथै सैनामैना जेसीजका पदाधिकारी तथा सदस्यहरूको उल्लेख्य उपस्थिति जनाउँदै सामुहिक रूपमा विरुवाको गोडमेल र वृक्षारोपणमा गरेका थिए ।
