सैनामैना जेसीजले आफ्नो जेसीज सप्ताह कार्यक्रम अन्तर्गत विद्यालयमा कार्यरत बस चालक र सह–चालकहरूलाई लक्षित गरी ट्राफिक सचेतना तथा अभिमुखीकरण कार्यक्रम सम्पन्न गरेको छ । सैनामैना–४ मा अवस्थित मुर्गिया खानेपानी उपभोक्ता तथा सरसफाई संस्थाको कार्यालयमा आइतबार सैनामैनाका वडा नं. १ देखि ४ सम्मका विद्यालयका चालक तथा सह–चालकहरूको सहभागिता रहेको थियो ।
नेतृत्व विकास र सामाजिक परिवर्तनः सैनामैना जेसीज वर्ष २०२५ का अध्यक्ष गोविन्द खरेलले जेसीजले युवाहरूको नेतृत्व विकाससँगै समाजमा सकारात्मक सन्देश प्रवाह गर्न र सामाजिक परिवर्तनमा काम गर्दै आएको बताउनुभयो । “सुरक्षित सडकका लागि गरिएको यो पहल समाजप्रतिको हाम्रो जिम्मेवारी हो,“ उहाँले थप्नुभयो ।
मुर्गिया खानेपानी उपभोक्ता तथा सरसफाई संस्थाका अध्यक्ष प्रेम बहादुर बाँनियले विद्यालयका बस चालक र सह–चालकहरूलाई आफ्नो पेशालाई केवल कामको रूपमा मात्र नलिई समाजका जिम्मेवार अभिभावकको भूमिका निर्वाह गरेको बताउनुभयो । “सुरक्षित यात्राका साथ विद्यालयका बालबालिकालाई स्कूल र घरसम्म पु¥याएर उहाँहरूले अभिभावकत्वको भूमिका निर्वाह गरिरहनुभएको छ,“ उहाँले भन्नुभयो, “कतिपय आधुनिक प्रविधिमा ट्राफिक नियमका नयाँ विधि र प्रक्रियाबारे जानकार बन्नुपर्ने हुनाले सचेतना कार्यक्रम निकै फलदायी हुनेछ ।“
इलाका प्रहरी कार्यालय रन्यौराका प्रमुख प्रहलाद के.सी.ले कार्यक्रममा सडक नियम, सुरक्षाका विषयमा विस्तृत सहजीकरण गर्नुभएको थियो । उहाँले दैनिक यात्रामा ध्यान दिनुपर्ने सामान्य तर महत्वपूर्ण ट्राफिक नियम र दुर्घटनाबाट बच्ने उपायहरू बारे प्रशिक्षण दिनुभएको थियो ।
कार्यक्रम सैनामैना जेसीजका प्रमुख सल्लाहकार कृष्ण भण्डारीको स्वागत तथा पूर्वअध्यक्ष रामचन्द्र ढकालको धन्यवाद ज्ञापन तथा महासचिव गोपाल भण्डारीको सञ्चालनमा सम्पन्न भएको थियो ।
